മെൽബൺ: അസാധാരണമായ കാലാവസ്ഥാ വ്യതിയാനം കാരണം ഓസ്‌ട്രേലിയയിലെ പ്രധാന ഉത്പാദന മേഖലകളിൽ നിന്നുള്ള മാമ്പഴ സീസണും വിപണി ലഭ്യതയും ഗണ്യമായി വൈകുന്നു. നോർത്തേൺ ടെറിട്ടറി ഉൾപ്പെടെയുള്ള വടക്കൻ മേഖലകളിൽ പെയ്ത അപ്രതീക്ഷിത മഴ മാവുകൾ പൂവിടുന്നത് വൈകിപ്പിച്ചതാണ് തിരിച്ചടിയായത്. 2008-ന് ശേഷമുള്ള ഏറ്റവും വൈകിയ മാമ്പഴ സീസണാണിത് എന്ന് കർഷകർ വ്യക്തമാക്കുന്നു. സാധാരണയായി സെപ്റ്റംബർ മാസത്തോടെ മെൽബൺ, സിഡ്നി തുടങ്ങിയ തെക്കൻ നഗരങ്ങളിലെ വിപണികളിലേക്ക് മാമ്പഴത്തിന്റെ വൻ വരവ് ആരംഭിക്കാറുള്ളതാണെങ്കിലും ഇത്തവണ പ്രാരംഭ വരവ് വളരെ പരിമിതമാണ്.
വിപണിയിൽ നിലവിലുള്ള മാമ്പഴ ദൗർലഭ്യം ഉത്പാദനക്കുറവ് മൂലമല്ലെന്നും, വിളവെടുപ്പിലും വിപണിയിലെത്തിക്കുന്നതിലും ഉണ്ടായ കാലതാമസം മാത്രമാണെന്നും കാർഷിക മേഖലയിലെ വിദഗ്ദ്ധർ ചൂണ്ടിക്കാട്ടുന്നു. 2026-27 സീസണിൽ രാജ്യത്ത് ആകെ 8.2 ദശലക്ഷം ബോക്സ് (7 കിലോഗ്രാം പെട്ടികൾ) മാമ്പഴ ഉത്പാദനമാണ് പ്രതീക്ഷിക്കുന്നത്. ഇതിൽ ഡാർവിൻ മേഖലയിൽ നിന്ന് 2.3 ദശലക്ഷം ബോക്സുകളും കാതറിനിൽ നിന്ന് 2 ദശലക്ഷം ബോക്സുകളുമാണ് പ്രധാന വിഹിതം. കൂടാതെ ബോവൻ/ബർഡെകിൻ (1.6 ദശലക്ഷം), മരീബ/ഡിംബുല (1.8 ദശലക്ഷം), സൗത്ത് ഈസ്റ്റ് ക്വീൻസ്‌ലൻഡ്, വെസ്റ്റേൺ ഓസ്‌ട്രേലിയ എന്നിവിടങ്ങളിൽ നിന്നുമാണ് ബാക്കി വിളവ് എത്തുക.
നോർത്തേൺ ടെറിട്ടറിയിൽ നിന്നുള്ള വരവ് വൈകുമെങ്കിലും ക്വീൻസ്‌ലൻഡിൽ നിന്നുള്ള ചില വിളവുകൾ നേരത്തെ എത്തുമെന്നാണ് കരുതുന്നത്. അതുകൊണ്ട് തന്നെ ഇരുമേഖലകളിൽ നിന്നുമുള്ള മാമ്പഴങ്ങൾ ഒരേസമയം വിപണിയിലെത്തി ഒക്ടോബർ അവസാനത്തോടെ ലഭ്യത സാധാരണ നിലയിലാകുമെന്നാണ് വിലയിരുത്തൽ. എന്നാൽ ഈ ഘട്ടത്തിൽ ഉണ്ടാകുന്ന കടുത്ത ചൂട് ഉത്പാദനത്തെ ബാധിക്കുമോ എന്ന ആശങ്ക കർഷകർക്കുണ്ട്. മെൽബൺ മൊത്തവ്യാപാര വിപണിയിൽ നിലവിൽ എത്തുന്ന ആദ്യഘട്ട മാമ്പഴങ്ങൾക്ക് മികച്ച ഗുണനിലവാരമുണ്ടെന്നത് ആശ്വാസകരമാണ്. ഒക്ടോബർ മുതൽ ഡിസംബർ വരെയുള്ള മാസങ്ങളാണ് ഓസ്‌ട്രേലിയയിൽ മാമ്പഴം വാങ്ങാൻ ഏറ്റവും അനുയോജ്യമായ സമയം; എങ്കിലും പ്രതിവാര വരവിനെ ആശ്രയിച്ചായിരിക്കും സൂപ്പർമാർക്കറ്റുകളിലെ വിലനിലവാരം നിശ്ചയിക്കപ്പെടുക.